香港新浪網 MySinaBlog
« 上一篇 | 下一篇 »
Max Chow | 23rd Sep 2010 | 軟件公司發展 | (980 Reads)

首先我想講如果唔係呢個 Project 實在太有趣,我一定唔會接。因為現時 everysoft.hk 這間菌企在風大雨大的市場中的生存策略是專注於『商業軟體開發』(詳情請看「用毛澤東策略,向商用小型軟件方向發展」一章),除了以前老闆比我做開既 Projects 之外,如果和主要業務無關的,一律要忍手唔接,避免分散力量,兩頭唔到岸。但為什麼這個 project 又會接呢?請看下去便會知道。

Picture

 

經過了天昏地暗,日月無光的一個月,終於完成了一個被我稱之為『神秘客人』所交托的 Project。之後我會放二天假獎勵下自己。

為什麼我稱她為 『神秘客人』?只因我連見她一面也沒有機會,只靠電話及 E-mail 便完成了整個的交易。她是高是矮,是肥是瘦,是否美麗 sexy,一概不知。只知道她的英文書寫能力拍得住我以前老闆及講電話很有上司的霸氣,在公司裏應該並不是小角色那種。

因她說這個 Project 的詳細內容需要保密,所以在接這單job前我同很大的氣力才得到了她的同意,完成後能在我的 Blog 上寫一點點關於這個 Project 所用到的東西。

(以下內容因經神秘客人剪輒過才出街,完整性可能有些不足,請見諒)

事源上個月頭的某一天9:00正a.m. ,我的 maxchow@everysoft.hk 郵箱收到了一個 E-mail。信中問了我幾個問題,譯做中文大約是:1) 在 City University of Hong Kong 圖書館找到的那本 "3-D perception by machine vision" 是否你寫的?內裏的數據是否精確? 2) 你是否曾經幫 NEC 設計及開發 e-Channel 過關系統的認人A.I. (Artificial Intelligence 人工智能)? 3) 你是不是有設計及開發八達通閘機的認人(Tail Gating) 系統? 4) 你對 Soft Computing 有什麼心得?

OMG!我心中一涼!佢係咪 FBI?益或係高登起底組?點解佢知道晒我 D 野既?? 自問無作奸犯科,應該唔驚掛?咁就覆返佢啦。至於 Soft Computing,對我來說,最有信心,最實用,而又最有實戰經驗當然係 Neural Network (神經網絡) + Kalman Filter 呢個拿手組合啦。Kalman Filter application 係我做研究生時的主要研究項目。而 Neural Network 呢,就係我果時跟果個 Professor 的強項。佢當時係 Department 裏面唯一能夠教 NN 的 Professor,而我就幫佢手做 NN 的教學用 Power Point 同 Notes (做RA有錢收,正!)。咦,都唔知講左去邊。講返單 Project 先。 

覆完佢 E-mail 之後話都無咁快 mouse 旁邊個手電即響!! 晨早流流100% Vol mp3 鈴聲 "就算世界無童話 ... " 真係比佢嚇到彈起,下次唔係街都係要記得較返細聲先得。手震震拿起個 blue tooth hand free 接電話。傾落之下原來係我以前老闆介紹我給她 (咁都無咁驚,唔係比人係網上起底)。原來她公司長期面對的難題是:需要搵出一堆 factors 同某D results 有無關系,如有關系係點有關系法,即有關系的話就需要找出它們的數學模型 (mathematical model) 以作往後預測之用。而且要知 D factors 又有否存在相互影響 (coupling effect) 而導致對 results 變為有關系或變成無關系。

好似講得好亂。 簡單來說,舉例如預測六合彩,你想求証六合彩個開彩號碼(Results) 同某 D factors 有無關系。Factors 可以估係當日的溫度,濕度,天干地支(亂講),你屋企隻神雀果日食左幾多粒米等等。然後,只要你比足夠歷史數據過我,我就可以嘗試搵返佢地既數學關系出來。如搵到,即好大機會這些 factors (當日的溫度,濕度,天干地支果D) 是估對了。它們和 Results (六合彩開彩號碼) 是有關的,並且已有足夠 factors 組合推論出 Results。講到呢度,希望我表達到。

講返單 Project。她公司現在要面對的,就是有一堆結果 (Results),要搵返影響到 D Results 的因素 (factors) 出來。佢地已經搵左好多有可能對結果有影響的因素出來,但無法証實那幾樣因素集合在一起便會影響到個結果,而又怎樣影響法。其實佢地公司都有自己具備專業資格的"算術人" (你估佢地讀邊科呢) 同 Software 人,仲點解搵我?係因為(事後証明) 有 D 數據係混雜有某 D 唔係 white noise 既 noise,令一般方法做唔返個潛在的數學關系出來。呢個就係點解要搵熟 Kalman Filter 及Soft Computing 的人了。Kalman Filter 用於日常生活中又最廣為人知的要算是 GPS (全球衛星定位) 了。你試想,個衛星係十萬八千里高空,又有雲又有雨阻住,民用都可以定到幾米誤差之內,你可想象 Kalman Filter 係幾咁有用。咦,又講左其他野!講返返來先。

傾完電話,果個小姐 send 左個用 Excel 2010 做的 Excel file 比我,有一堆初步已整理好的有可能的因素及結果,佢話呢D只係其中少少的一part 仔,她叫我睇下搵唔搵得返佢地既數學模型出來。我見係我以前老闆個 friend,D Excel 數據又整整齊齊,簡簡單單,唔使好多時間,咁就唔同佢講錢住,做一做睇下點先。唔使三個鐘做完,証實到某 D factors 組合同 Results 係有關既。做好個 mathematical model 一齊 send 返比佢。過左半個鐘,電話又響!今次我較細左個 mp3 鈴聲,無比佢嚇親。佢係電話度話個 model OK,算係幾準。我再問佢有幾準,原來佢 send 比我果 D Excel data 佢地同事之前已經做到了一個 model, send 來只係試下我搞唔搞得掂。而個準確度暫時試起來我的 model 是超過了佢手頭上自己做好了的那個 model 了。 然後她當然跟手落單了。但之後要搵的數據就難很多很多。好多時要把形容詞量化成數據。例如客戶滿意度化成數據,以輸入系統分析等等。都是很花時間的。可幸最後都能準確完成。(為保護神秘人業務範圍,「客戶滿意度」呢樣野係作既)。

最後我想話,做這個 Project 對 everysoft.hk 往後的發展是有可能有深遠的影響。因為這 Project 証明了 原來 everysoft.hk 在 non-linear mathematical modeling 方面在市場上應該是有著很強的競爭力,而這方面適用的範圍相當大。例如股票基金佬想知道某些因素和某些股價是否有關系,如有關系點先求得返個關系的數學公式出來。市場調查公司想分析數據,搵返邊D因素會影響客人點消費,有幾大影響,點影響法。甚至賭場想搵返出邊 D 因素會導致客仔買乜 number 等等。想得出就可試做。

希望憑住呢個 project,可開拓出另一條 profit margin 高點及競爭者不容易進入的路給 everysoft.hk 這間香港微企成長。