香港新浪網 MySinaBlog
« 上一篇 | 下一篇 »
Max Chow | 14th Jun 2010 | 軟件公司發展 | (1141 Reads)

呢排諗緊公司業務的發展方向。好像上次所講, 最大理想當然是做軟件控制系統開發工程。一步一步發展出一間真真正正的本地工程公司,以香港本地的技術及人材,接 E&M Project。之後接 MTR,機電署 E&M Project - (發緊綺夢)。 工程界風大雨大,大財團財雄勢大,一條無錢無權又無勢既 Engineer,根本是以蛋擊石。想合作都唔會理你 (係工程學會場合見面講兩句已知,所謂人在位情還在,人不在位 ... 預左)。 諗唔通野既時候,我會走返去母校 CityU

對我來說,係果度,好有安全感。

佢比左好多知識同學歷我 ... undergraduate,MPhil ... 仲有 Ming Sir, Prof 草,Louis Sir, 去到果度個心就好有 Support,好有力量咁。Picture

南山村,又一城,城大公園,哥和老街公園,都係我讀書時好似呀伯咁一路行一路睇下花花草草一路諗野既地方。我又一路行一路諗,比我諗到一樣野:共產黨!!

點解當時國民黨有800萬大軍,共產黨得60萬兵力,但係共產黨只係用左三年多便反敗為勝??參考佢既戰略,好可能搵到D線索。 (先旨聲明,我唔識政治)。拿拿聲沖入圖書館(用 alumni 証),搵書+上網。 睇左好多本書同網上資料,最後得出一個我自己認為係係我依家情況好適用既指引。話說國共內戰的頭一年,毛澤東曾經下個指令:戰略上要以一敵百,戰術上要以百敵一。

此話何解?搵左一輪,最後我唔記得係"信報"定"明報"十幾年前既一篇『中原地產』老闆『施永清』寫既文章解釋左比我知:佢以前一開始開檔果時,好鬼勤力,住宅,商廈,廠,地鋪,乜都做。由朝早做到夜晚,星一至七唔停。雖然都搵到少少飯錢,但同其他老牌地產公司拼,佢係捱打狀態。因為佢地得好少人,樓盤人際網絡亦未夠人地廣,稱得上係艱苦經營。佢咁情形就係以一敵百。人地人多,佢地人少。佢之後覺得咁落去唔掂,係一個偶然既機會,佢睇到毛澤東呢句野,細心參詳推敲之下,終於想通左!佢立刻改變策略,只做一種樓盤。我記得好似係某一區域 (唔記得係咪荃灣) 既小型住宅。佢全力咁只做一樣樓盤,久而久之,荃灣既小型住宅就係佢最齊盤同最熟。咁D人搵荃灣既小型住宅,咪一定搵佢啦。反觀佢既對手雖然人多,但佢地乜都做,高難度豪宅又做,分散晒力量,咁係"荃灣既小型住宅"呢個 topic ,就得返十份一個人既時間去做啦。咁呢個情形就可以形成以百敵一啦!係一個小領域企穩了陣腳,之後就可以一步一步發展出去 ... 商廈,廠,地鋪 ... 一個個領域續步占領或協同合作。

有左呢個發現,當然要問下我覺得醍既人我有無諗錯啦。果晚咁0岩約左最熟成日見果班 CityU 識既同學仔女們去顛。

PicturePicture 

佢地唔係全部工程人,有讀 translate 呀,Management 呀,英文呀咁。有D MPhil 同學仔仲幾年間就做到尖沙咀買鋪請員工了。所以,知識都比我廣。問佢地,必有所鑊 (當然佢地到依家都係激烈反對我唔做MTR啦)。事但一問,佢地就介紹左本英文書過我,係 AI Ries 寫既 【Focus: The Future of Your Company Depends on It】。原來佢地好多個都睇過,唉 ... 我真係無知。書裏面講到係今時今日每一 business 都已被做緊果行既公司高度優化的情況底下,要打入市場就得一招:『鎖定一個市場,一個目標,一個"產品"』。即是,把全部焦點力量集中一點,先有得同係果行做開的企業係果一點度競爭或一齊做。另外又睇到Andy Grove (Intel 前 CEO) 有提到他信俸的策略是:『寧把所有的雞蛋放在一籃子裏,然後投入一切精力,看這籃子是否恰當,而不把雞蛋分散到不同的籃子』。兩個人其實都係講緊同一樣野。

綜合以上,中國人同鬼佬都有一致睇法。經過我一輪沉思之後,係無其他更好的方法底下我同意了呢套說法:焦點戰術

咁依家 EverySoft.hk 應該點做呢?根據【think it big, do it small】這老掉牙的創業法則,開始時應該做一些容易做,又簡單既東西。 想來想去,軟件業裏面,比較易賣得來又簡單既就係小型 Business Application Software。(Web Site 都可以做簡單有BackEnd 既,但要有 Graphic 人配合先得,現階段要揀D我全部做得晒的,變數細D。)

好喇,咁之後就用毛澤東方法:揀一行業,然後全力做一個果行業需要的商用小型軟件出來!!繼而制訂公平的制度吸引伙伴協同合作,發展出似樣的公司。 就咁決定!!

決定了,便去做,之後結果會如何呢?哈哈,我想幾個月內好快會知 ... 好期待~

做 Freelance Programmer,就是這樣刺激,我想,這就是創業的吸引之處!